A piratería dixital diminuíu un 4% en 2016, o primeiro descenso en dez anos

A piratería de contidos dixitais diminuíu un 4% en 2016 respecto de datos de 2015, o que supón o primeiro descenso en dez anos, segundo as conclusións do Observatorio da piratería e hábitos de consumo de contidos dixitais 2016 que presentaron este martes a Coalición de Creadores e industrias de Contidos e LaLiga. 

Segundo estes datos, en 2016 houbo 4.128 millóns de accesos ilegais a contidos, un 4,2 por cento menos que en 2015, por valor de 23.294 millóns de euros (-3,2%), pero aumento un 6,8 por cento o lucro cesante sufrido polas industrias culturais e de contidos, alcanzando os 1.783 millóns. O cinema é o contido máis pirateado: un 32 por cento dos usuarios, seguido polas series (27%), música (26%), libros (22%), videoxogos (12%) e fútbol (10%).

En concreto, durante o pasado ano o acceso ilegal a contido cinematográfico foi de 789 millóns de películas, cun valor no mercado de 6.935 millóns de euros. O 33 por cento dos accesos produciuse cando a película aínda se estaba proxectando nas salas de cinema, fronte ao 36 por cento de 2015. En canto ás series, un total de 959 millóns de capítulos foron reproducidos ou descargados de maneira ilegal en 2016 e o 39 por cento deles tivo lugar durante o período de emisión en televisión. O valor en mercado desta cifra é de 1.577 millóns de euros.

En música, durante 2016, accedeuse a 1.661 millóns de contidos musicais, cun valor de 5.767. O número de consumidores que accedeu pasou do 21 ao 26 por cento. O 48 por cento destes accesos corresponderon a contidos con menos dun ano de antigüidade comercial. En libros, os accesos ilegais alcanzaron os 374 millóns, cun valor de mercado de 3.103 millóns de euros. En canto aos videoxogos, o acceso ilexítimo tivo como resultado 223 millóns de accesos, cun valor de 5.608 millóns de euros.

Respecto ao fútbol, durante 2016 visualizáronse de forma ilegal un total de 122 millóns de partidos de fútbol nun 10 por cento dos fogares de España, un punto menos que en 2015. 

O valor de mercado das devanditas retransmisións superou os 369 millóns de euros.